Militante PL 250 Afilia ba PD, Lassama:

Militante PL 250 Afilia ba PD, Lassama: Mai Hamutuk Hadia Povu Nia Moris
DILI – Militante Partido Liberal hamutuk ema nain 250 lidera husi Armando da Silva, Sabadu (9/6), deklara ofisialmente afilia ba Partido Demokratiko.
“Iha loron ida nee ho oras nee ba oin, ami hamutuk ho PD atu lori povu ho nasaun nee ba oin ho diak, liu husi programa PD nian iha eleisaun jeral nee,” dehan Koordenador PL, Marcus da Consencao ba STL wainhira halao juramento afilia ba PD iha Fatumeta Usindo I, Dili.

Serimonia afiliasaun militante PL atravesa ho konsolidasaun PD iha Usindo. Seremonia nee hetan partisipasaun direitamente husi Prezidenti PD Fernando ‘Lasama’ de Araujo, Sekjen PD Mariano ‘Assanami Sabino no kuadru politiku nasaional PD. Marcus hatete, lolos sira sei mantein nafatin iha PL, maibe Prezidenti PL hola desizaun katak la avansa ona ba oin iha eleisaun parlamentar, no ba hamutuk ho CNRT. Tan nee direjenti PL haree ba deside atu fihir partidu PD hanesan partidu politiku nebee sira hili atu lori sira nia aspirasaun iha eleisaun parlamentar.

Responde konaba razaun afilia ba PD, Marcus hatete, antes atu deklara tama PD, sira haree programa partidu plitiku sira hotu iha rai nee. Tuir nia haree PD iha nia programa diak nebee iha korelasi ho situasaun povu nasaun nee nian. “Hau sei halo tuir deit estatutu politiku PD nian, nudar dalan ida deit hodi servi povu no nasaun nee. Hau ho hau nia kolega sira halo juramentu nee iha matebian sira nia sasin,” Marcus deklara.

Iha fatin hanesan Prezidenti PD Lasama hatete, ho hakoak boot ba militante nebee uluk hamutuk ho PL iha momentu importante ida nee mai hamutuk iha PD sai servidor ba povu no nasaun ida nee. Ho afilia nee ba oin sei la sai arependementu ba militante sira ho vizaun katak PD hakarak fo esforsu-an tomak, enerjia tomak ba moris povu nian.

Tuir Lasama la iha tan objetivu seluk iha PD nia hanoin husi intereses povu ho nasun nian. PD husu ba joven sira tenki kaer liman ba malu, la bele monu ba manobra politika foer hodi hafahe malu. PD maka kaer ukun iha periode tinan lima oin mai maka sei hadia uluk maka estrada husi Distritu ba Sub-Distritu hotu tenki tau alkatraun (aspal). Hodi nunee povu iha baze bele faan sira nia sasan hodi hetan osan. Osan dollar nee la bele dolar diet iha Dili, maibe tenki dolar mos too iha baze. Hari nasaun husi baze, nee maka PD nia vizaun politika wainhira povu fo fiar liu husi eleisaun.

“Bem vindo ba kompaneiru sira, mai ita hotu-hotu hakaas-an. Timor nia vida iha tempu badak nia laran. PD fiar sei hetan votus boot, see povu hili PD maka kaer ukun povu sei hetan benefisiu boot iha sektores 7 nebe maka PD trasa, ”Lasama aponta. Alende nee mos Sekretario Jeral PD Assanami husu ba joven sira iha kampanha nia laran nee tenki sai juru kampanye (jurkam-red) iha idak-idak ba hatoo malu sira iha fatin hotu-hotu.

Tuir Sekjen PD, eleisaun mai nee hanesan husu povu sira la bele hili ema nebe kriminozu nebe uza politika foer harahun nasaun no hafahe povu. “La bele hili partidu nebe maka iha krizi nia laran fahe kilat hodi ohon povu no uza polisia sai fali istrumentu politika nian, ”Assanami hatete ho lia makaas. Bre