Monday, March 05, 2007

Brigadeiro Rerden:Major Alfredo Maka Responsabliza Konsekvensia Situasaun

UN PRESS CONFERENCE

1/ March/2007

Brigadeiro Rerden:
Major Alfredo Maka Responsabliza Konsekvensia Situasaun

Komadante Forsa Internasional (FSI) iha Timor Leste Brigadeiro Mal Rerden hateten, Major Alfredo maka responsabiliza konsekvensia sira nebe maka mosu hosi situasaun tempu agora iha distritu Manufahi liu – liu iha Same relasiona ho operasaun nebe maka FSI halao dadauk ne’e.
Nia dehan katak FSI hamutuk ho Governu TL ho Nasoens Unidos tenta hela hodi resolve sutuasaun atual ne’e tanba ne’e husu ba povu Timor Leste tomak atu bele kompriende katak kualker konsekvensia hosi situasaun atual ne’e parte Alfredo nia responsabilidade tanba situasaun (operasaun ) hanesan ne’e mosu tanba ninia asaun.
“Saida maka akontese hosi tempu agora ne’e ninia (Major Alfredo) responsabilidade. “Forsa Seguransa Internasional no governu TL no ONU koko hela hodi rezeolva situasaun difisil ida ne’e. Ne’e maka povu tenke kompriende katak konsekvensia hato’o responsabilidade hosi Alfredo Reinado,” dehan Brigadeiro Rerden, iha konferensia da imprensa, kinta (01/03), iha Dili.
“Ida ne’e situasaun ida ke seriu. Hau hein katak kada ema ida – ida bele kompriende. Konsekvensia hosi situasaun ida ne’e hanesan responsabilidade (Major) Alfredo Reinado. Ninia asaun hamosu situasaun ida ne’e, laiha tan ema seluk. No povu Timor Leste hakarak kompriende sirkumtansia, sira presiza atu kompriende tanba saida maka asaun ne’e mosu.”
Oras hirak maka fo Alfredo ho ninia ema sira atu rende an, Brigadeiro Rerden dehan katak nia lakoi atu halo espekulasaun. Maibe nia husu atu Alfredo ho ninia ema sira tenke rende an lalais.
“Nia iha obsaun ida; Nia bele ajuda povu Timor Leste hodi rende an no entrega nia kilat,” tenik Komadante Rerden.
Entertantu hosi Same, Deputadu Parlamentu Nasional Leandro Isac hateten via telemovel katak situasaun desde FSI halo operasaun hodi kaptura Alfredo to’o horeseik ne’e situasaun iha Same laran hatudu katak povu barak maka sente tauk hodi halao aktividade hanesan babain – bain.
Nia hateten, aktividade governu nian iha neba ne’e ladun lao diak no loja no restautante hot – hotu taka. Satan, Leandro hatutan, populasaun sira mos sente la barani hodi ba sira nia toos hodi foti hahan.
Emprezario ida nebe maka lakoi temi nia naran mos fo deklarasaun hanesan katak atividade eskola, negosio no funsionario sira nia paradu duni tanba estrada importante iha Same ne’e hetan taka hosi militar Australia sira.
“Agora (horeseik) so kios sira maka loke maibe loja sira no restaurante sira taka tanba laiha ema ba sosa sasan,” dehan fonte ne’e.
Iha parte seluk, ba jornalista sira horeseik Representante Sekretario Geral Nasoens Unidos iha Timor Leste, Atul Khare mos rekonhese katak situasaun iha Same ne’e seriu duni.
Nia dehan, ofisila sivil ONU nia balu nebe maka durante ne’e fo ajuda ba prosesu eleitoral iha Same mos evakua tiha ona horeseik ba Dili.
“Ofisial uituan hosi parte ONU ninian nebe maka ajuda iha prosesu eleitoral ba Dili,” tenik Khare.
Maibe nia dehan, sei laiha evakuasaun boot nebe sei halo atu tuun ba Dili.
Relasiona ho situasaun hanesan ne’e, Leandro husu ba estadu atu bele deklara ba nasaun katak distritu Same ne’e hanesan area operasaun militar nian agora ka oinsa los. Atu nune’e ema hot – hotu bele kompriende tanba iha tempu agora ne’e ema barak maka sente tauk duni.
‘Estadu tenke deklara konaba estatus Same nian ne’e oinsa los. Hanesan area militar nian ka nusa,” dehan Leandro.
Hafoin iha Domingo (25/02) Major Alfredo ho ninia grupu desarma membru Unidade Polisia Fronteira nian ho kilat hamutuk 18 iha distritu Malian ho Suai, iha segunda (26/02) Presidente Republika Kay Rala Xanana Gusmao deklara katak estadu fo kbiit FSI atu halo operasaun hodi kaptura Major Alfredo ho ninia ema sira.
Xefi UNMIT Atul Khare mos konkorda katak diak liu Alfredo ho ninia grupu rende an deit sekuandu nia hadomi duni povu no hakarak estabilidade iha nasaun ida ne’e.
“Hau hein katak nia (Major Alfredo) sei bele entrega an hodi nune’e bele tuir justisa liu hosi dalan paz sekaundu nia hadomi duni nia povu no se nia hadomi duni estabilidade iha nasaun ida ne’e,” dehan Xefi UNMIT ne’e, iha konferensia da imprensa.
“Hanesan Presiden Gusmao rasik indika tiha ona katak esforsu barak maka halao tiha ona hodi oinsa kultura justisa bele kontinua liu – liu maneira dame nian. Hanesan Brigadeiro Rerden hateten tiha ona no Presidente Gusmao hateten tiha ona iha ninia estatementu katak buat ne’e responsabilidade tomak Alfredo Reinado nian konaba situasaun tomak nebe maka ita hasoru agora.-END

Fausto de Sousa
MNEC-Public Affairs

No comments: